2024年10月20日
峽谷及湖旅行團
喺阿拉木圖嘅期間，最主要就係參加咗一個兩日一夜嘅旅行團，團嘅內容就係去參觀哈薩克最大嘅峽谷同埋兩個非常之有特色嘅湖, 而由於係兩日一夜，晚上就會住喺哈薩克小鎮嘅HomeStay，體驗傳統小鎮嘅食物及住宿。
概要
第一天
- 集合
- 查林峡谷
- 科爾賽湖
- 食宿
第二天
- 康迪湖
- 黑峡谷
- 月亮峡谷
集合
一大早大概七點就要起身，梳洗完，八點就去到集合地。 坐嘅車就係以下嘅 15座位旅遊巴。
呢個團要180usd, 最多嘅參加人數人是15人的，但好彩我的團比較少，只有一行6個人，我，一個波蘭叔叔，一個印度男生，一個意大利家庭，我們的領隊是個25歲的本地女生，有點大頭蝦但性格很樂天很平易近人。
查林峡谷
一開始在市區集合後，就出發。坐大概3小時就到了第一個景點，查林峡谷(CHARYN CANYON). 喺呢個查林峽谷係非常之大，你會見到好多唔同形狀嘅峽谷，沿着峽谷嘅路行就會去到一條湖. 係可以選擇由落車點行30分鐘或坐佢哋嘅4DW車去到河邊. 沿路就可以欣賞到峽谷唔同石嘅形狀，非常壯觀. 團友話同美國嘅Grand Canyon 好似.
CHARYN CANYON的全景
去完峽谷後, 中午就去了homestay的地方，吃午餐。
呢個係佢哋嘅餐桌，佢呢邊會習慣點都會喺枱面上放咗啲糖果餅乾果醬，有啲似我哋新年嘅全盒，但佢哋放成年。所以喺等食嘅時候都可以有啲小食食住先。
今餐最主要就係食咗呢一個炒飯，佢係用牛肉同埋飯同蘿蔔作為配料。老實講我覺得有啲似我哋平時食開嘅炒飯所以你旅遊嘅朋友唔使擔心因為其實啲食物比較似，可能因為哈薩克有好大部份係比較近東亞，所以食嘅嘢係有啲似嘅。
科爾賽湖(Kolsai Lake)
午餐後我哋就去咗另一個景點, 科爾賽湖, 係哈薩克南部天山山脈中的一組高山湖泊，由三個湖泊組成. 三個湖泊分別位於不同的海拔高度，最低的湖泊位於海拔1,818米，最高的湖泊位於海拔2,850米.
嗰度係一個好靚比山包圍住嘅湖, 湖非常之平靜。 喺呢度除咗享受大自然之外，可以騎馬，亦可以划船。
我就愉快地參加咗呢兩個活動, 價錢為:
騎馬:5000 kzt [~10USD] per ride
撐船:5000 kzt [~10USD] /boat per hour
晚上 (食宿)
跟住就返到HomeStay 食晚餐， 晚餐係比較似撈麵嘅。
住宿
我哋就係住咗喺裏面嘅其中三間房， 我同導遊妹妹一間， 波蘭叔叔印度男仔同司機一間， 意大利家庭自己一間。嗰晚夜晚雖然係有啲凍，但係間屋入面係暖嘅，佢哋有Wi-Fi但唔算特別強，比較麻煩嘅係 大家 連同當晚留喺呢個Homestay嘅另外四五人係共用一個廁所， 所以去廁所或者沖涼都等得有啲耐。但除咗呢樣嘢之外，個HomeStay都叫乾淨同舒服。 所以我嗰晚都瞓得幾好。
題外話，我同穆斯林嘅導遊妹妹一間房，見證住佢會夜晚及朝早4:30起身去向着西邊祈禱， 對我嚟講係一件新鮮嘅事。 所以我都問咗佢一啲我嘅問題，例如呢邊嘅穆斯林通常都唔會帶頭紗，佢哋都係可以着佢哋想着嘅， 而我其實亦都有問到關於比較極端嘅穆斯林佢哋嘅問題，都導遊妹妹話嗰啲係極端嘅宗教分子，同佢哋本身嘅理念係唔一樣。
呢個係Homestay嘅走廊，佢哋會用山羊嘅角做裝飾
其實呢個Homestay入邊都有Yurt， 我哋都有問如果住喺個Yurt 要幾錢， 而嗰邊就話要 另外加多50000 Kzt（～100USD）， 所以我哋就放棄咗。（所以之後我聽到另一個女仔佢嘅團係包埋住喺Yurt， 團費亦都比我平少少覺得嗰個比較值得去：））
康迪湖(Kaindy Lake)
一大早食完早餐後，我哋就出發去康迪湖, 同琴日唔同嘅係，我哋去康迪湖坐嘅車係一間4DW, 因為佢中途嘅路係非常之爛嘅山路. 途中更會經過一段很凹凸不平跟有水的路. 全程大概15分鐘， 會感受到好似坐過山車咁，係一個幾得意嘅體驗，如果易暈車浪嘅人，我會建議睇吓有冇得坐副駕位, 相對會冇咁Chok.
去到車程嘅位置後, 同目的要去嘅 仲有少少距離, 而係呢個時候你係可以選擇以下嘅方式前往:
- 行山 (30min, free)
- 騎馬 (7000ktz, return)
- 坐車 (500ktz per ride)
由於琴日騎咗馬，所以我就選擇咗行山，沿途嘅景色都好靚，有好多好高嘅杉樹，山脈好清晰，空氣非常之清新，所以大家可以按着自己嗰刻想法去選擇用咩形式前往康迪湖.
湖中最引人注目的是那些直立在水中的雲杉樹幹。這些樹木在湖形成時被淹沒，由於水溫較低和缺乏腐蝕性生物，樹幹得以保存至今，形成了奇特的"水下森林"景觀,康迪湖的水非常清澈，在晴天時呈現出美麗的綠松石色。湖水溫度常年保持在攝氏6度左右，即使在夏天也非常寒冷
黑峡谷 & 月亮峡谷
完成咗康迪湖呢個景點後我哋就前往最後嘅兩個峽谷，都係喺阿拉木圖嘅旅途當中，首先就係黑峽谷, 黑峽谷係由黑色的火山岩構成，岩壁呈現出獨特的黑色和深灰色色調。喺嗰度逗留咗15至20分鐘後我哋就出發去另一個峽谷-月亮峡谷, 以其類似月球表面的地貌而得名.
黑峡谷
月亮峡谷
喺嗰度我有 着住民族服同鷹影相, 有趣嘅係成個團嘅當中，我哋去到好多唔同嘅地方啲人都會覺得我係屬於哈薩克嘅人:)
咁樣就去晒今日嘅景點，時間大概為三點，我哋就出發啟程返到阿拉木圖。回到市中心嘅時間大概為18:00. 咁樣成個旅程就完成了。
個人感想
個人覺得十分之推介，因為可以在 兩日一夜裏可以看到很多比較少見嘅景色，而中亞旅遊嘅其中一個好處就係即使係遊客區，也並不是非常多遊客對比起其他非常出名旅遊嘅國家，所以你可以更加感受到大自然，遊客區亦沒有非常商業化。 但 由於他們越來越對比較多的國家放寬簽證，所以可以預計到未來應該會越來越多的遊客，所以有興趣去嘅大家不妨早啲去啦。
最後都想講吓安全問題，相信好多人對旅遊嘅時候都會擔心 安全問題， 以我個人經驗，中亞哈薩克阿拉木圖，吉爾吉斯，烏茲別克都是十分安全的地方，比起其他有難民問題的國家及南美洲 來說，即使我晚上在街 行，都感到安全。當然大家要小心向遊客的詐騙，尤其是機場及旅遊景點裏的的士， 其他的話我認為都算是一個非常安全的國度。
