2024年10月11日
獨自旅行的媽媽們
除咗欣賞唔同地方嘅文化建築規劃之外，旅途中遇到嘅人都係其中一個我十分享受獨自出走嘅原因。亦都係為成個旅程增加十分多唔同嘅色彩。
所以呢一系列嘅文章都想分享同記錄一下我旅途中所遇到俾我啟發嘅人今次留喺中亞嘅一個幾月期間，住青旅嘅時候，分別遇到兩個媽媽級既solo traveler.一個係來自馬來西亞，一個係來自星加坡，佢哋一樣嘅係已經有幾個小朋友，而小朋友都已經大晒出嚟做嘢，而且另一半都唔太想去啲比較落後少少既國家。所以，佢哋就自己一個去旅行。
在哈薩克遇到的馬來西亞Auntie
同Auntine係喺第一日去到哈薩克嘅青旅門口遇到的，佢好親切咁提醒我入青旅的門口要用鞋套，跟住我地就展開了對話
對話間發現大家都係搭同一班airasia的飛機到達Almaty (有啲飲恨點解唔早啲識，可以一齊坐的士）
我地check in後，就開始傾少少大家既背景，大家打算既旅行計劃。最開心嘅係，大家都可以用廣東話傾偈，好多時去旅行遇到嘅都係一啲歐美嘅背包客，所以真係好珍惜每一次旅行可以講廣東話嘅機會。
傾咗一陣後，交流左大家打算參加嘅團後，就留左contact，睇下第二日有無機會一齊去探索阿拉木圖呢一個城市。
到第二日我七點起身，發現Auntie已經由於時差既關係，朝早四點已經出發了，於是我同姨姨就相約咗喺其中一個景點green blazzar,一個當地嘅最大型市集入面見。
當中我哋都傾到大家去過嘅其他國家，原來佢係小朋友大個出身做野後，就開始去好多地方，對佢來講呢個國家已經係第81個國家，佢喺過去十年期間去晒咁多個唔同嘅洲。
佢有提到佢特別鍾意坐遊輪，佢仲介紹我好多點樣揾last minute遊輪既方法比我🫢(得閑既時候我都寫個post update下),
睇住佢滿足既笑容，大家一齊討論唔同國家既分別，再係個green blazzar度買下生果，姨姨有發揮佢媽媽既角色叫我買食多啲生果，仲請左我食奇異果。時間好快就過😁
跟住大家有唔同既計劃就分開左。
最後佢有啲特別事要早啲離開Alamty, 佢好貼心咁留左啲佢之前為去峽谷同埋湖既tour預備既乾糧比我😁
係佢身上真係會覺得好多認為唔可能既野係可能。可能好多人會認為女人生完小朋友就係留係屋企或者工作，等退休可能參加下啲團咁。
好欣賞Auntie既勇氣去探索世界！
在吉爾吉斯遇到的星加玻Auntie
今次呢個旅程真係遇到好多媽媽級既人carry我！
去到另一個中亞國家，吉爾吉斯，又係咁岩到步既第一日就遇到另一個媽媽級既solo traveller!
同佢係一間叫apple hostel既青年旅舍相遇，嗰時大家都係checkin櫃檯前問職員野，咁就認識左留左電話。
我地都咁岩報左同一個hostel 舉辦既團，去Ala Archa National Park。auntie又係好發揮住媽媽既本色，提我參加咩團同埋去行山既時我行得慢又會等埋我🤣
我本身係想報一個3日既騎馬團去song kul lake，但個hostel一直都無覆我得唔得，最後auntie有suggest我可以跟佢揾嗰個tour, 5日去哂幾個主要景點,係佢揾到既價錢中最平既團(中亞幾國雖然主要物價都比較低，但啲團既費用都幾誇張，唔識揾就會比多左好多錢)
Auntie做功課做得好足，佢主要係會加入facebook group,同問唔同agent公司去揾最有效率同性價比高既團。我就好好彩咁最後可以free-ride佢去左啲團😁
佢小朋友大哂，幾年前退休，就會去唔同地方旅行，佢話中亞呢啲比較需要體力既地方，想係自己仲行得走得既時候去左，年紀再大既時候就可以去郵輪嗰啲。
無記錯姨姨年紀應該係60, 但真係會比佢既體力嚇親，佢係成日都可以保持好精神，喺我哋參加完五日嘅旅行團後，我其實差唔多用咗一日半去休息(當然我身體差啲)，auntie佢喺個團完咗之後嘅第二日已經參加緊其他嘅day tour,係講緊要搭成4-5個鐘車，仲要行山嗰一種。真係不得不佩服姨姨既體力！
同埋佢好玩得好願意試新野，我同佢會一齊買啲當地既酒夜晚係個yurt度一齊同團友分享。我地仲會成班一齊夜晚著住啲當地人衫係度扮以前既nomad生活。
真係好佩服佢！同埋成個旅程佢都會好照顧我。好似我地都會由brisket 坐車番almaty,佢會知我上次miss過一次班巴士，而今次佢早我一日去，佢會send哂信息同影哂相比我，教我點去。真係好開心可以遇到auntie! 希望有機會再見😁😁
啟發
呢兩位auntie都比到我好多啟發，好多時你會覺得去到某啲年紀，就應該做番某啲年紀既野。係佢地身上你只會見到年青同想探索世界既心境同有過好多經驗既智慧。
我都好想用呢兩個我既小偶遇帶比我既鼓勵去鼓勵一啲想做但唔敢踏出第一步嘅人，好多事當你踏出咗嘅時候，雖然係會有遇到啲不常見嘅事情要學習處理嘅時候，但係要對自己有信心，係可以做到嘅。
而我屋企為例子，對我爸爸媽媽來講除咗跟團旅行之外，連自己去旅行其實都好似係一樣只係屬於年輕人嘅事。但你諗吓，喺同一個時空下都係華人既aunties佢地已經係去左好多地方，試緊用好多現有既資訊同科技去令自己有一個愉快既體驗😁
有時以為不可能既事，原來係某啲人眼中係平常事！(當然係要量力而為!)
