2024年12月03日
吉爾吉斯陸路去哈薩克
方法二: 的士(吉爾吉斯段)+共享的士(哈薩克段）
係吉爾吉斯番哈薩克時，我就試左坐共享的士的方式。
以下係我成個旅程用嘅時間同發生嘅事件，可供大家概覽及參考:
| 時間 | 事件 |
|---|---|
| 8:50 | 吉爾吉斯比斯凱克叫車(Yandex) |
| 9:33 | 落Yandex，步行到吉爾吉斯陸路離境口岸 |
| 10:00 | 過完吉爾吉斯口岸 |
| 10:00 - 10:30 | 排隊過關入境哈薩克（得一條比外國人入境的隊，會見住啲本地人好快過到我就等咗半個鐘 :( |
| 10:30 | 一去到就問有無去almaty既share taxi |
| 12:00 | 被”賣”中 |
| 13:30 | 到達Almaty |
吉爾吉斯出發
由於比斯凱克(Bishkek)市中心比較接近邊境，我先叫車(Yandex)到邊境 (大概800KGS, ~70HKD)，再過關，然後入境哈薩克後
前往邊境的的士上
落的士步行到過境的大堂
哈薩克邊境找共的士
離開大堂時，會有一大班司機係度問要唔要上佢地車，夾齊人番番呀拉木圖的市中心。我的本地朋友同我講，定價通常係5000KZT。
我當時就見到一個好aggressive既姨姨，佢收我6000KZT, 其實公價應該係收5000KZT, 但我見同車兩個年輕吉爾吉斯的女仔，佢地又識英文，可以幫手翻譯同全女感覺安全啲，所以就上左🤣。 以我嘅估計，上嘅共享的士應該係阿姨自己嘅車，佢橫掂都要返阿拉木圖市中心，就不如車多幾個乘客賺返啲油錢。所以架車相對比較新淨。
哈薩克邊境乘坐的共享的士
通常呢啲車會收夠4個人先開車，嗰個呀姨可能太急，所以收左我地3個就開，跟住去到半路就發現少左個人😂，佢就有同後面兩個女仔叫佢地比多啲錢，佢地當然無比。
佢行左10分鐘就停左係個小賣部停左，跟住問我地收錢，佢有問我加唔加多4000KZT比佢車我番到我屋企，我知正常 自己叫車的價錢係2000KZT左右,就話唔洗，跟住傾傾下就傾左係2k。
其實比起坐巴士係幾舒服，我坐前座，有少少熱，感覺呢邊啲人唔太鐘意開冷氣。 但位置比較寬敞同埋視野都好清晰，所以乘坐嘅體驗都係幾唔錯。
沿途看見的風景
沿途看見的風景
在車上的無助
但最唔好嘅位就係，雖然佢係應承咗會帶我哋去到火車站，但中途有好多位佢會無啦啦停咗喺度，例如:
個呀姨會無啦啦停左係度攞水，見住佢攞3個5L水係度攞水。。。佢停車係唔會通知聲的。。
阿姨家中與阿拉木圖的距離
而最後我哋亦都停咗喺佢屋企門口，等佢放返啲水入屋，嗰個位置係距離阿拉木圖市中心大約1小時車程。
隨意停頓的呀姨
被”賣”
跟住就係我最生氣嘅位，原來佢成程車係咁聯絡其他司機車用低嘅價錢，(好似我咁俾咗2000KZT，佢就以1000KZT) 去”賣”我去坐其他人嘅車，嗰個司機會由佢屋企附近的大路送我去到阿拉木圖市中心，而另外兩個女仔就係”賣”去坐咗另外一架車車佢哋去到火車站。全程佢係冇同我哋講過亦都係好多位係無啦啦停咗喺度。
好彩同我同車嘅兩個女仔係識得英文同埋識得當地嘅語言，所以佢哋用英文同我解釋返 (“She is selling us”)，同佢哋交談嘅時候睇得出佢哋嘅無奈，但佢哋亦好似習慣咗會有咁嘅情況發生，所以佢哋好佛系咁樣上咗第二架車，我自己就有少少嬲，因為我係完全唔知道發生咩事，難聽啲講俾人賣咗都唔知，而接我去阿拉木圖嘅車係一架十分之舊嘅車，上嘅時候內心非常不安。。。 最後無驚冒險喺1:00成功返到阿拉木圖。 (的確係有啲佩服阿姨嘅商業頭腦)
晚上跟當地認識嘅朋友一齊飲番杯，煩惱即時冇晒:)。
晚上跟朋友喝了一杯好Cocktail
個人感想/推薦？
經歷過坐巴士及坐共享的士喺哈薩克同吉爾吉斯中間陸路跨境。 體驗到兩種方法的優劣：
| 巴士 | 共享的士 |
|---|---|
| 時間比較長(前後6-7小時) | 時間比較短(大約4小時) |
| 價錢比較便宜 | 價錢是巴士的大約一倍，但也算是可承擔的 |
| 座位比較細 | 座位比較大(坐前座的話) |
| 比較難搵到過關時上落車的位置 | 供應還是比較多，比較易找到 |
| 大集團經營，比較安心 | 小本生意，不確定性及危險程度較高 |
| 有比較多同路的乘客，感覺安心 | 只有少部份人乘坐，只能相信司機 |
雖然坐共享的士用嘅時間係會比較少，同埋好似我坐前座係比較舒服。但係要面對嗰種不確定性，同埋喺唔識當地語言嘅情況下，如果我再要去，我一定會選擇搭巴士。 唔知大家又會揀啲咩呢？
